100 onns Fundaziun Schiller svizra

Cun ses num renda la Fundaziun Schiller svizra omagi a Friedrich Schiller, l’autur dal Wilhelm Tell. Sia activitad consacrescha ella dentant exclusivamain a la litteratura producida actualmain en las quatter cuminanzas linguisticas da la Svizra.

Ils pensums pli impurtants da la fundaziun èn tenor ils tschentaments:

• la distincziun d’ovras impurtantas da l’art litterara cun premis annuals;
• la surdada dal Grond premi Schiller mintga 4 fin 6 onns.

Ils tschentaments fixeschan ultra da quai:

I pon vegnir distinguids auturs ed auturas ch’èn en possess da la naziunalitad svizra ni tals che èn domiciliads en Svizra dapi almain 5 onns.

Il cussegl da fundaziun che sa cumpona dal presidi e dals commembers da las giurias da las cuminanzas linguisticas, assegna er ils premis Schiller da la Banca Chantunala da Turitg.

La Fundaziun Schiller svizra è ina corporaziun independenta, suttastà dentant a la supervisiun dal Departament federal da l’intern (Uffizi federal da cultura). L’uniun „Auturas ed auturs da la Svizra“ (AdS) è represchentada cun in commember en il cussegl da fundaziun.
L’onn 2005 ha la Fundaziun Schiller svizra festivà ses 100avel anniversari. Cun quella chaschun è cumparida la publicaziun festiva:
Schweizerische Schillerstiftung / Fondation Schiller suisse / Fondazione sivzzera Schiller / Fundaziun Schiller svizra 1905-2005. Editurs: Estelle Schiltknecht e Ernst Nef. 2 toms, 110 paginas.

La publicaziun festiva è bain illustrada e cuntegn ina survista sur da l’istorgia da la fundaziun, mintgamai in concept extendì davart ils premiads da mintgina da las quatter cuminanzas linguisticas sco er il register cumplet da tut las auturas ed ils auturs premiads da la fundaziun durant tschient onns.
La publicaziun festiva po vegnir retratga per il pretsch da
CHF 45.- al secretariat da la fundaziun.