Grond Premi Schiller
La Fundaziun Schiller svizra è vegnida fundada l’onn 1905. Ella è stada l’emprima instituziun svizra che ha promovì la litteratura. Per questa lavur ha ella collavurà stretgamain cun la Confederaziun. Ella è dentant era vegnida sustegnida da chantuns, vischnancas e persunas privatas. Ina da las incumbensas principalas ils emprims onns è stà il sustegn d’auturas ed auturs en difficultads finanzialas. Cun il temp è la fundaziun dentant sa concentrada pli e pli sin la surdada da premis da litteratura naziunals. Ina grond’impurtanza ed in grond renum aveva il Grond Premi Schiller, che è vegnì surdà ventg giadas tranter il 1920 ed il 2012.
Ils davos trent’onns dal 20avel tschientaner han ils chantuns e las citads pli e pli cumenzà a promover sezs la litteratura, ed il sustegn per la Fundaziun Schiller svizra è vegnì pli pitschen. L’onn 2012 ha era la Confederaziun cumenzà a surdar agens premis da litteratura. Sin quai è la collavuraziun tranter la Fundaziun Schiller svizra e l’Uffizi federal da la cultura ida a fin. En in rom pli modest vul la Fundaziun Schiller svizra dentant cuntinuar cun sias activitads a favur da la litteratura svizra e surdar vinavant premis per la producziun litterara en las quatter linguas naziunalas.
1920 Carl Spitteler (1845-1924)
1922 Jakob Bosshart (1862-1924)
1923 Philippe Godet (1850-1922)
1928 Francesco Chiesa (1871-1973)
1930 Jakob Schaffner (1875-1944)
1936 Charles F. Ramuz (1878-1947)
1943 Peider Lansel (1863-1943)
1948 Meinrad Inglin (1893-1971)
1955 Gonzague de Reynold (1880-1970)
1960 Friedrich Dürrenmatt (1921-1990)
1973 Max Frisch (1911-1991)
1982 Denis de Rougemont (1906-1985)
1988 Giorgio Orelli (1921-2013)
1992 Hugo Loetscher (1929-2009)
1997 Maurice Chappaz (1916-2009)
2000 Grytzko Mascioni (1936-2003)
2005 Erika Burkart (1922-2010)
2010 Philippe Jaccottet (1925)
2012 Giovanni Orelli (1928-2016)
2012 Peter Bichsel (1935)